Գլխավոր դատախազը հովանավորում է Ալեն Սիմոնյանին. «Ժողովուրդ»
«Ժողովուրդ» օրաթերթի հրապարակման համաձայն՝ գլխավոր դատախազ Աննա Վարդապետյանը չի արձագանքել ԱԺ նախագահ Ալեն Սիմոնյանի՝ բուքմեյքերական ոլորտի հետ հնարավոր կապերի վերաբերյալ հնչեցված մեղադրանքներին։
Թերթը հարցում էր ուղարկել դատախազություն՝ պարզելու, արդյոք պատգամավոր Հայկ Սարգսյանի հայտարարությունների հիմքով նախաձեռնվել են ստուգումներ, ուսումնասիրություններ կամ վարույթներ, ինչպես նաև՝ եթե ոչ, ապա ինչու։
Սակայն դատախազությունից պատասխանել են ընդամենը, որ քրեական վարույթի առկայության վերաբերյալ տվյալներ չկան՝ չանդրադառնալով մնացած հարցերին։
Հրապարակման մեջ սա գնահատվում է որպես ոչ բավարար արձագանք և փաստացի անգործություն՝ ընդգծելով, որ չի իրականացվել հայտարարությունների բովանդակային ստուգում։
Թերթը եզրակացնում է, որ նման մոտեցումը կարող է ընկալվել որպես ԱԺ նախագահի նկատմամբ հնարավոր հովանավորչության դրսևորում։