Hetq.am․ ԱՆԻՖ-ին ենթակա պետական ֆոնդը 700 մլն դրամ է ներդրել նախկին տնօրեն Փափազյանի ընկերոջ բիզնեսում
Hetq.am-ի հրապարակման համաձայն ԱՆԻՖ-ին ենթակա «Ձեռնարկատեր+Պետություն հակաճգնաժամային ներդրումներ» պետական ֆոնդը 2022 թվականին 700 միլիոն դրամ է ներդրել «Գլոբալ Քոննեքթ» ՓԲԸ-ում, որը կապվում է ԱՆԻՖ-ի նախկին տնօրեն Դավիթ Փափազյանի մտերիմ ընկեր Սերգեյ Գրիգորյանի հետ։ Ըստ հոդվածի՝ ներդրումն իրականացվել է երեք տրանշով, իսկ դրա նպատակը եղել է բեռնատարների և կիսակցորդիչների ձեռքբերումը՝ Հայաստանի ներմուծող և արտահանող խոշոր ընկերություններին սպասարկելու համար։ Ներդրման արդյունքում պետական ֆոնդը դարձել է ընկերության 49 տոկոսի բաժնետերը։
Hetq.am-ը նշում է, որ պետական միջոցների հաշվին իրականացված այս ներդրումը հարցեր է առաջացնում նաև գնահատման տեսանկյունից։ Հրապարակման համաձայն՝ մինչև պետական ներդրումը «Գլոբալ Քոննեքթն» ունեցել է ընդամենը մի քանի բեռնատար, մինչդեռ ընկերության արժեքը գնահատվել է այնպիսի մակարդակով, որ պետությունը 700 միլիոն դրամի դիմաց ստացել է միայն 49 տոկոս բաժնեմաս։ Ավելին՝ ըստ հոդվածի, հենց պետական ներդրումից հետո ընկերությունը կարողացել է զգալիորեն ընդլայնել իր ավտոպարկը։
Հրապարակման կարևոր հատվածներից մեկը վերաբերում է Դավիթ Փափազյանի և Սերգեյ Գրիգորյանի կապերին։ Hetq.am-ը, ուսումնասիրելով «Պանդորայի փաստաթղթերը», պարզել է, որ նրանք նախկինում ունեցել են նաև համատեղ օֆշորային բիզնես շահեր Բրիտանական Վիրջինյան կղզիներում։ Ըստ հրապարակված փաստաթղթերի՝ Սերգեյ Գրիգորյանը մասնակցել է Փափազյանի օֆշորային ընկերություններից մեկի բաժնեմասի փոխանցման գործընթացին, իսկ մեկ այլ օֆշորային կազմակերպությունում նրանք հանդես են եկել որպես գործընկերներ։ Հոդվածում նշվում է, որ այս փաստերը կարող են կարևոր նշանակություն ունենալ ԱՆԻՖ-ի գործունեության շուրջ ընթացող քրեական վարույթի շրջանակում։
Hetq.am-ը հիշեցնում է նաև գլխավոր դատախազ Աննա Վարդապետյանի հայտարարությունը, ըստ որի՝ քննվում են ԱՆԻՖ-ի և մի շարք ընկերությունների հետ համատեղ գործունեության ընթացքում հնարավոր չարաշահումների դրվագներ։ «Գլոբալ Քոննեքթի» անունը ևս շոշափվում է այդ գործով։ Միաժամանակ իրավապահները քրեական հետապնդում են նախաձեռնել ԱՆԻՖ-ի նախկին տնօրեն Դավիթ Փափազյանի, ինչպես նաև պետական ներդրումների կառավարման գործընթացում ներգրավված այլ անձանց նկատմամբ։
Հոդվածում անդրադարձ կա նաև ԱՆԻՖ-ի միջոցով իրականացված այլ խոշոր ներդրումներին։ Ըստ Hetq.am-ի՝ պետական ֆոնդից միլիարդավոր դրամներ են ուղղվել այնպիսի ընկերությունների, որոնք առնչվում են նախկին բարձրաստիճան պաշտոնյաների կամ նրանց շրջապատի հետ։ Այդ թվում հիշատակվում են «CFW», «Universal Closures» և «Berrymount» ընկերությունները, որոնց կապում են Տիգրան Ավինյանի շրջապատի կամ ազդեցիկ ֆինանսական շրջանակների ներկայացուցիչների հետ։
Միաժամանակ կառավարությունը որոշել է սկսել պետական ֆոնդի ներդրումների դիմաց ձեռք բերված բաժնետոմսերի օտարման գործընթացը։ Ըստ հրապարակման՝ ներդրում ստացած ընկերություններին առաջարկվել է հետ գնել պետական բաժնեմասերը՝ ներդրված գումարի և հաշվարկված տոկոսների դիմաց։ «Գլոբալ Քոննեքթի» դեպքում խոսքը մոտ 921 միլիոն դրամի մասին է։ Սակայն, ինչպես նշում է Hetq.am-ը, ընկերությունները դժգոհ են կառավարության պայմաններից և առաջարկել են ավելի մեղմ տարբերակներ, որոնք մերժվել են։
Հրապարակման եզրափակիչ հատվածում ընդգծվում է, որ ներդրում ստացած ընկերությունները փաստացի կանգնած են երկընտրանքի առաջ՝ կամ համաձայնել կառավարության առաջարկած ֆինանսական ծանր պայմաններին, կամ հայտնվել պետական համակարգի և իրավապահների ուշադրության կենտրոնում՝ հաշվի առնելով ԱՆԻՖ-ի շուրջ ընթացող քրեական գործերը։