Թալինի քաղաքապետի դեմ ընտրակաշառքի գործ չի հարուցվի. ՀՀ Քննչական կոմիտե
Քննչական կոմիտեն նշում է, որ Սափեյանը սոցիալական օգնությունը տրամադրել է ոչ թե որպես պատգամավորի թեկնածու, այլ որպես համայնքի ղեկավար։ Միջոցները չեն բաժանվել հասարակությունից գաղտնի։
Հայաստանի Հանրապետության Արագածոտնի մարզի Թալին խոշորացված համայնքի ղեկավար Տավրոս Սափեյանի դեմ քրեական գործ չի հարուցվի։ Այս մասին սոցիալական ցանցի իր էջում, ի պատասխան ԶԼՄ-ների հարցումների, պարզաբանել է Քննչական կոմիտեի մամուլի քարտուղար Մարիա Օհանջանյանը։
Ավելի վաղ «Անկախ դիտորդ» հասարակական կազմակերպությունը հայտարարել էր, որ Սափեյանը կարիքավոր քաղաքացիներին հատկացրել է ավելի քան 11 միլիոն դրամի (մոտ 30 000 դոլար) սոցիալական օգնություն՝ խախտելով նախընտրական շրջանում գործող բարեգործության արգելքը։ Կազմակերպության ներկայացուցիչները նշել էին, որ պատրաստվում են հաղորդում ներկայացնել դատախազություն։
Քննչական կոմիտեն պարզաբանում է, որ թեև Սափեյանը պատգամավորի թեկնածու է (Նիկոլ Փաշինյանի «Քաղաքացիական պայմանագիր» կուսակցությունից), սակայն տվյալ դեպքում նա սոցիալական օգնությունը բաշխել է ոչ թե որպես թեկնածու, այլ որպես համայնքի ղեկավար քաղաքացիների սոցիալական խնդիրները լուծելու նպատակով՝ նրանց դիմումների հիման վրա:
Օգնություն տրամադրելու որոշումները կայացվել են համայնքապետարանին կից գործող հանձնաժողովի կողմից:
Քննչական կոմիտեն շեշտում է, որ ներկայացված հաղորդման մեջ և ԶԼՄ-ների հրապարակումներում չկան տվյալներ այն մասին, թե օգնության տրամադրումն ուղեկցվել է նախընտրական քարոզչությամբ կամ իրականացվել է գաղտնի։
Ինքը՝ Սափեյանը, «Անկախ դիտորդ» կազմակերպության հետ զրույցում հայտարարել է, որ նախկինում ևս պարբերաբար օգնություն է հատկացրել կարիքավոր քաղաքացիներին։