«Հետք». Խաչատուր Սուքիասյանի թիկնապահը 130 000 դոլարով հող է գնել և ապօրինի անասնաֆերմա կառուցել
Ըստ «Հետք»-ի՝ Արարատի մարզի Ռանչպար գյուղում գտնվող նորակառույց անասնաֆերման պաշտոնապես գրանցված է ԱԺ ՔՊ խմբակցության պատգամավոր Խաչատուր Սուքիասյանի թիկնապահ Ռոման Խանամիրյանի անունով։ Կադաստրի տվյալներով՝ Խանամիրյանը 2023 թվականի փետրվարին 3.5 հեկտար հողամասը գնել է 130 հազար դոլարով, այնուհետև գրավադրել Սուքիասյանների ընտանիքին պատկանող «Հայէկոնոմբանկում»։
Հետաքննության համաձայն՝ հողամասում նախկինում ևս եղել են անասնաշենքեր, սակայն 2024 թվականի արբանյակային լուսանկարներում արդեն երևում է լայնածավալ կառուցապատում․ կառուցվել են նոր շինություններ, հին անասնագոմերը զգալիորեն ընդլայնվել են, իսկ ամբողջ տարածքը պարսպապատվել է։ «Հետք»-ը նշում է, որ շինարարությունն իրականացվել է առանց քաղաքաշինական փաստաթղթերի և շինթույլտվության։
Մասիսի համայնքապետարանը 2023 թվականին երկու անգամ արձանագրել է ապօրինի շինարարության փաստը։ Նախ Ռոման Խանամիրյանը 800 հազար դրամով տուգանվել է ինքնակամ անասնագոմ և պարիսպ կառուցելու համար, ապա ևս 2.5 միլիոն դրամ տուգանք է սահմանվել՝ նույն տարածքում ապօրինի բնակելի տուն կառուցելու պատճառով։ Համայնքապետարանը նաև պահանջել է քանդել ապօրինի շինությունները, սակայն դրանք մինչ օրս պահպանվում են։ Գործով ներգրավվել է նաև ՀԿԱԾ-ն, որը արգելանք է դրել Խանամիրյանի գույքի և դրամական միջոցների վրա։
«Հետք»-ը գրում է, որ գյուղացիները համոզված են՝ ֆերմայի իրական սեփականատերը Խաչատուր Սուքիասյանն է։ Լրատվամիջոցը հարցում է ուղարկել պատգամավորին, սակայն նրա մամուլի խոսնակն արձագանքել է, թե Սուքիասյանը գործարարությամբ չի զբաղվում և հրապարակման մեջ նշված գույքի հետ կապ չունի։ Ինքը՝ Ռոման Խանամիրյանը, չի հերքել, որ Սուքիասյանի թիկնապահն է, և հաստատել է, որ Ռանչպարում անասնաֆերմա է կառուցել։