«Հետք». «ՄԼ մայնինգ»-ի սեփականատերն ուզում է շահագործել Ազատեկի ոսկու հանքը. նոր զարգացումներ հանքավայրի շուրջ
Ինչպես հայտնում է «Հետք»-ը, Վայոց ձորի մարզում գտնվող Ազատեկի ոսկի-բազմամետաղային հանքավայրի շուրջ վերջին շրջանում ակտիվ զարգացումներ են տեղի ունենում։ «ՄԼ Մայնինգ» ընկերության սեփականատեր Դավիթ Սուքիասյանը ներգրավվել է «Փրեշիըզ քոր» ՍՊԸ-ում՝ ձեռք բերելով ընկերության 50% բաժնեմասը։ Ընկերությունը հայտ էր ներկայացրել Ազատեկի հանքավայրում երկրաբանական ուսումնասիրություններ իրականացնելու համար։ Սուքիասյանը միաժամանակ մասնակցություն ունի նաև Սոֆի-Բինայի ոսկու հանքավայրի ծրագրում։
«Հետք»-ի փոխանցմամբ՝ Սոֆի-Բինայի հանքավայրում նախատեսվում է ոսկու կորզում ցիանային տեխնոլոգիայով։ Զառիթափ համայնքում նախատեսվում է կառուցել հարստացուցիչ գործարան և պոչամբար, իսկ որպես հումքային բազա դիտարկվում է նաև Ազատեկի հանքավայրը։ Հանրային լսումների ընթացքում բնակիչների կողմից բարձրացվել են շրջակա միջավայրի, գյուղատնտեսության և հնարավոր ցիանային ռիսկերի վերաբերյալ մտահոգություններ։
Միևնույն ժամանակ, Ազատեկի հանքավայրի ուսումնասիրության լիցենզիան արդեն տրամադրվել է «Աուրում Միներալս» ՍՊԸ-ին։ Սակայն, ըստ «Հետք»-ի, ընկերությունը չի անցկացրել հանրային լսումներ, չի ստացել ավագանու որոշում և շրջակա միջավայրի փորձաքննական եզրակացություն։ Սա հարցեր է առաջացրել գործընթացի օրինականության և թափանցիկության վերաբերյալ։
Հոդվածում նշվում է նաև, որ «Աուրում Միներալս»-ը կապ ունի ամերիկյան ներդրողների և հանքարդյունաբերական ոլորտում գործունեություն ծավալող ընկերությունների հետ։ ՏԿԵ նախարարությունը պնդում է, թե իրականացվում են միայն «սենյակային պայմաններում» պաշարների վերագնահատման աշխատանքներ, սակայն մասնագետներն ընդգծում են, որ նման գործընթացը ևս պետք է ենթարկվի օրենքով սահմանված փորձաքննությունների։