Ինչպես բազմապատկվեց ՔՊ-ական պատգամավոր Հայկ Ցիրունյանի ունեցվածքը. «Ժողովուրդ»
«Ժողովուրդ» օրաթերթը գրում է, որ իշխող «Քաղաքացիական պայմանագիր» կուսակցության նախկին ակտիվ ներկայացուցիչ Հայկ Ցիրունյանն այս ընտրություններին այլևս ընդգրկված չէ կուսակցության նախընտրական ցուցակում։ Ըստ հրապարակման՝ քաղաքական դաշտից նրա լուռ հեռանալուն զուգահեռ վերջին տարիներին կտրուկ աճել է նաև նախկին պատգամավորի ունեցվածքը։ Եթե դեռ 2021 թվականին Ցիրունյանը հայտարարագրել էր, որ չունի ո՛չ բնակարան, ո՛չ հողամաս, ո՛չ էլ ավտոմեքենա, ապա ընդամենը մի քանի տարվա ընթացքում նրա հայտարարագրերում սկսել են հայտնվել հողամասեր, ամառանոց, թանկարժեք ավտոմեքենա, կրիպտոակտիվներ և խոշոր կանխիկ միջոցներ։
Թերթը հիշեցնում է, որ ՏՏ ոլորտից քաղաքականություն եկած Հայկ Ցիրունյանը դեռ 2001 թվականից աշխատել է որպես ծրագրավորող, իսկ 2014-2020 թվականներին եղել է «Matersson» ընկերության համահիմնադիրն ու տնօրենը։ 2018 թվականին նա հայտնվել էր Երևանի ավագանու «Իմ քայլը» խմբակցությունում, այնուհետև 2020-ից դարձել Ազգային ժողովի պատգամավոր, իսկ 2021-ին կրկին մանդատ ստացել արդեն ՔՊ ցուցակով։
«Ժողովուրդ»-ի ներկայացրած տվյալների համաձայն՝ 2021 թվականին պատգամավորը հայտարարագրել էր ընդամենը 280 հազար դրամ բանկային միջոց, 18 հազար դոլար և 8.25 միլիոն դրամ կանխիկ գումար։ Սակայն արդեն 2022 թվականին նա ձեռք է բերել առաջին անշարժ գույքը՝ Երևանի Շենգավիթ վարչական շրջանում գտնվող հողամաս, ինչպես նաև հայտարարագրել «Մատտերսոն Հոմ» ՍՊԸ-ում 50 տոկոս բաժնեմաս։
2023 թվականը, ըստ թերթի, դարձել է ունեցվածքի առավել արագ ընդլայնման շրջան։ Ցիրունյանը գնել է Կոտայքի մարզի Աբովյան համայնքում երկու հողամաս, ինչպես նաև Արագածոտնի մարզի Ապարան համայնքում անավարտ շինություն։ Նույն տարում նրա հայտարարագրում հայտնվել է նաև 2014 թվականի արտադրության LEXUS մակնիշի ավտոմեքենա։
Արդեն 2024 թվականին նախկին պատգամավորը հայտարարագրել է չորս անշարժ գույք և ձեռք բերել ևս մեկ հողամաս՝ Ապարանում։ Բացի պատգամավորական աշխատավարձից, նա նշել է նաև 3.5 միլիոն դրամ վարձակալության եկամուտ։ Իսկ 2025 թվականի հայտարարագրում արդեն առկա են հինգ անշարժ գույք՝ Ապարանում հողամաս և ամառանոց, Աբովյանում երկու հողամաս և Շենգավիթում գտնվող հողամաս։ Միևնույն ժամանակ հայտարարագրվել է նաև 0.5 BITCOIN կրիպտոակտիվ, միլիոնավոր դրամների կանխիկ միջոցներ, ինչպես նաև ավելի քան 8 միլիոն դրամ վարկային պարտավորություն և գյուղատնտեսական գործունեության ծախսեր։
Թերթը նկատում է, որ ընդամենը մի քանի տարվա ընթացքում զրոյական անշարժ գույքից նախկին պատգամավորը հասել է հինգ միավոր անշարժ գույքի, թանկարժեք մեքենայի, կրիպտոարժույթի և խոշոր դրամական միջոցների։ Եվ հենց այս ֆոնին առավել ուշագրավ է համարվում այն փաստը, որ նախկին ակտիվ ՔՊ-ական Հայկ Ցիրունյանն այս ընտրություններին արդեն դուրս է մնացել կուսակցության ցուցակից։
«Ժողովուրդ»-ը հիշեցնում է նաև, որ ժամանակին թերթի հետ զրույցում հնչեցրած նրա հայտնի արտահայտությունը՝ «գործընթաց է երկրում, եղբայր», լայն տարածում էր ստացել և վերածվել մեմի։