Հովիկ Աբրահամյանը չէր կարող, Ռուստամ Բաքոյանը կարող է. 137 մլն եկամուտն ու կասկածելի կապերը
Oragir.News-ի հրապարակման համաձայն՝ ԱԺ «Քաղաքացիական պայմանագիր» խմբակցության պատգամավոր Ռուստամ Բաքոյանի ներկայացրած 2025 թվականի հայտարարագիրը հանրային քննարկումների նոր առիթ է դարձել։ Ըստ հրապարակման՝ Բաքոյանը մեկ տարվա ընթացքում գյուղատնտեսական գործունեությունից ստացել է 137 մլն 400 հազար դրամ և 45 հազար 800 ԱՄՆ դոլար եկամուտ։ Բացի այդ, նա հայտարարագրել է պատգամավորական աշխատավարձ՝ 14,2 մլն դրամ և 636 հազար դրամ կենսաթոշակ։
Հրապարակման մեջ ընդգծվում է, որ 2022-2024 թվականների հայտարարագրերում նման ծավալի գյուղատնտեսական եկամուտներ գրեթե չեն արձանագրվել, ինչն առաջացրել է հարցեր եկամուտների աղբյուրների վերաբերյալ։ Բաքոյանը հայտարարագրել է նաև Երևանի բնակարան և Արարատի մարզի Նոր Կյանք գյուղում գտնվող ավելի քան 322 քմ մակերեսով առանձնատուն, սակայն նրա անվամբ ավտոմեքենա, գյուղատնտեսական տեխնիկա կամ արժեթղթեր չեն գրանցվել։
Oragir.News-ը նաև անդրադարձել է պատգամավորի կապերին Ջնդի Ամարյանի հետ, որի անունը տարբեր տարիներին հայտնվել է մամուլի և իրավապահների ուշադրության կենտրոնում։ Հրապարակման հեղինակները հիշեցնում են, որ նախկինում Նիկոլ Փաշինյանը կոշտ քննադատության էր ենթարկում նախկին վարչապետ Հովիկ Աբրահամյանի գյուղատնտեսական եկամուտների վերաբերյալ հայտարարությունները, մինչդեռ այսօր նմանատիպ հարցեր են առաջանում արդեն գործող իշխանության պատգամավորի հայտարարագրի շուրջ։ Ըստ հրապարակման՝ սա կրկին օրակարգ է բերում հարցը՝ արդյո՞ք բոլոր պաշտոնյաների նկատմամբ կիրառվում են նույն չափանիշները։