Մինչ Գալյանը երգում-պարում է, ԴԱՀԿ պաշտոնյան ավտոմեքենաներ է նվիրում և ստանում
Oragir.News-ի հրապարակման համաձայն՝ ՀՀ արդարադատության նախարարության Հարկադիր կատարումն ապահովող ծառայության (ԴԱՀԿ) տեսչական և վերլուծական բաժնի գլխավոր խորհրդատու Գևորգ Կուլյայի Խաչիկյանի 2025 թվականի հայտարարագիրը մի շարք հարցեր է առաջացրել՝ կապված նրա կողմից իրականացված գույքային գործարքների հետ։
Հրապարակման համաձայն՝ 2025 թվականի փետրվարի 14-ին Գևորգ Խաչիկյանը քաղաքացի Գագիկ Օհանյանից որպես նվեր ստացել է 2014 թվականի արտադրության Mercedes-Benz մակնիշի ավտոմեքենա։ Նույն օրը պաշտոնյան իր հերթին Գագիկ Օհանյանին նվիրել է իրեն պատկանող 2017 թվականի արտադրության BMW մակնիշի ավտոմեքենան։
Ըստ Oragir.News-ի՝ նույնատիպ գործարքը կրկնվել է նաև 2025 թվականի նոյեմբերի 21-ին։ Այս անգամ Գևորգ Խաչիկյանը քաղաքացի Համազասպ Արթուրի Խաչատրյանից նվեր է ստացել 2019 թվականի արտադրության BMW ավտոմեքենա, իսկ նույն օրը վերջինիս նվիրել է ամիսներ առաջ Գագիկ Օհանյանից ստացած Mercedes-Benz-ը։
Հրապարակման հեղինակները նշում են, որ նման «փոխադարձ նվիրատվությունների» շղթան կարող է բազմաթիվ հարցադրումների տեղիք տալ՝ կապված գործարքների տնտեսական նպատակահարմարության, գույքի իրական շարժի և ֆինանսական միջոցների ծագման հետ։ Հոդվածում նաև հարց է բարձրացվում, թե ինչ հարաբերություններ ունեն Գագիկ Օհանյանն ու Համազասպ Խաչատրյանը ԴԱՀԿ բարձրաստիճան պաշտոնյայի հետ և ինչու են ներգրավված նմանատիպ գործարքներում։
Oragir.News-ը նաև ընդգծում է, որ այս փաստերը հրապարակվում են այն ժամանակ, երբ իշխանությունները շարունակաբար հայտարարում են կոռուպցիայի դեմ անզիջում պայքարի մասին։ Հրապարակման համաձայն՝ ներկայացված տվյալները հիմք են տալիս քննարկելու ԴԱՀԿ համակարգում հնարավոր ստվերային մեխանիզմների, այդ թվում՝ հարկադիր աճուրդների կազմակերպման և գույքային գործարքների թափանցիկության վերաբերյալ հարցերը։