Չոռնի Գագոն Երևանին կվճարի գրեթե 77 մլն դրամ․ դատարանը բավարարել է պետշահերի պաշտպանության հայցը
Երևանի նախկին քաղաքապետ, ՀՀ տրանսպորտի և կապի նախկին նախարար Գագիկ Բեգլարյանից, որն առավել հայտնի է Չոռնի Գագո մականունով, հօգուտ Երևանի համայնքի կբռնագանձվի 76 միլիոն 822 հազար դրամ։
Այս մասին հայտնում է ՀՀ գլխավոր դատախազությունը՝ նշելով, որ Հակակոռուպցիոն դատարանը ամբողջությամբ բավարարել է Երևանի Կենտրոն և Նորք-Մարաշ վարչական շրջանների դատախազության հայցը՝ համայնքին պատճառված վնասի հատուցման պահանջով։
Հայցը դատարան էր ներկայացվել 2025 թվականի սեպտեմբերի 3-ին՝ պետական (համայնքային) շահերի պաշտպանության լիազորությունների շրջանակում։ 2025 թվականի սեպտեմբերի 9-ին Հակակոռուպցիոն դատարանը հայցադիմումն ընդունել էր վարույթ և բավարարել դատախազի միջնորդությունը՝ 76 միլիոն 822 հազար դրամի չափով արգելանք դնելով Գագիկ Բեգլարյանին պատկանող գույքի վրա։
Հայցի հիմքում դրվել էին քրեական վարույթներից մեկով հաստատված փաստական հանգամանքները։
2026 թվականի հուլիսի 7-ին Հակակոռուպցիոն դատարանը ամբողջությամբ բավարարել է դատախազության հայցը։ Վճիռն օրինական ուժի մեջ մտնելուց հետո Գագիկ Բեգլարյանից հօգուտ Երևանի համայնքի կբռնագանձվի 76 միլիոն 822 հազար դրամ՝ որպես համայնքին պատճառված վնասի հատուցում։
Հիշեցնենք, որ Գագիկ Բեգլարյանը Երևանի քաղաքապետի պաշտոնը զբաղեցրել է 2009-2010 թվականներին, իսկ 2012-2016 թվականներին եղել է ՀՀ տրանսպորտի և կապի նախարար։
Նրան մեղադրանք է առաջադրվել 2012 թվականին պաշտոնեական լիազորությունները չարաշահելու և առանձնապես խոշոր չափերով փողերի լվացման հոդվածներով։ 2026 թվականի հունիսի 5-ից Բեգլարյանը գտնվում է կալանքի տակ և իրեն առաջադրված մեղադրանքը չի ընդունում։