ORAGIR.NEWS. 1 մլրդ. 450 հազար դրամի վերանորոգում՝ Աննա Հակոբյանի ազգականի ղեկավարած պոլիկլինիկայում
Գյումրիի թիվ 2 պոլիկլինիկայի շենքում հունիսից մեկնարկել են լայնածավալ շինարարական աշխատանքներ։ Գյումրիի ամենամեծ և ամենահին պոլիկլինիկաներից մեկը հիմնանորոգվում է շուրջ 1 մլրդ 450 մլն դրամի ներդրմամբ։
Շինաշխատանքների ընթացքում պոլիկլինիկան ժամանակավորապես գործում է նախկին «Սամարիթեր» հիվանդանոցի շենքում։ Հիվանդանոցների օպտիմալացումից հետո տարիներ շարունակ չօգտագործված շենքն այժմ օգտագործվում է որպես պոլիկլինիկայի ժամանակավոր տարածք։
Թիվ 2 պոլիկլինիկան քաղաքի ամենամեծ պոլիկլինիկաներից է և սպասարկում է մեծ թվով բնակիչների։ Ուշագրավ է նաև, որ թիվ 2 պոլիկլինիկայի շենքը պատմական է․ այն կառուցվել է 1936 թվականին։
Ըստ առկա տեղեկությունների՝ հիմնանորոգման ընթացքում շենքում էական ճարտարապետական փոփոխություններ չեն նախատեսվում։ Շինարարական ընկերությունից վստահեցնում են, որ պահպանվելու է տեսքը, իրենք ընդամենը ռեստավրացիա են անում, թարմացնում և շտկում շենքում առկա թերությունները։
Երկհարկանի շենքը պահպանելու է իր նախկին տեսքը։ Գյումրիի ամենամեծ պոլիկլինիկաներից մեկի շենքի հիմնանորոգման համար պայմանագրային ավարտի ժամկետը սահմանված է 2029 թվականը։
Հիշեցնենք, որ թիվ 2 պոլիկլինիկայի տնօրենը Նիկոլ Փաշինյանի կնոջ` Աննա Հակոբյանի մորաքրոջ թոռն է Վահագն Մկրտչյանը, ով անցած տարվա հոկտեմբերին Շիրակի մարզպետ Դավիթ Առուշանյանի որոշմամբ Գյումրիի թիվ 2 պոլիկլինիկայի տնօրեն է նշանակվել։