News.am․ Փաշինյանի կադրը պետական պաշտոնում աշխատելու ընթացքում 5 բնակարան է ձեռք բերել և 160 հազար դոլար արժողությամբ «Մերսեդես»
ՀՀ սննդամթերքի անվտանգության տեսչական մարմնի ղեկավար Տիգրան Պետրոսյանը, որը 2020 թվականից տարբեր պաշտոններ է զբաղեցրել վարչապետի աշխատակազմում, 2025 թվականին գնել է 160 հազար դոլար արժողությամբ նոր «Մերսեդես-Բենց»։ Ինչպես գրում է News.am-ը՝ ուսումնասիրելով պաշտոնյայի գույքի, եկամուտների, ծախսերի և շահերի տարեկան հայտարարագիրը, հաշվետու տարում Պետրոսյանի եկամուտը կազմել է շուրջ 17,6 միլիոն դրամ։
Հայտարարագրի համաձայն՝ Պետրոսյանին պատկանում է 9 անշարժ գույք, որից 7-ը՝ Երևանում։ Դրանցից հինգը ձեռք են բերվել վերջին չորս տարվա ընթացքում։ Պաշտոնյան տարվա սկզբին հայտարարագրել է երեք տրանսպորտային միջոց, որոնցից երկուսը վաճառել է։ 2019 թվականի արտադրության «Մերսեդեսը» վաճառվել է 32 միլիոն դրամով, իսկ 2001 թվականի արտադրության «Ֆորդ» բեռնատարը՝ 1,2 միլիոն դրամով։ Սեպտեմբերի 11-ին Պետրոսյանը 61,535 միլիոն դրամով ձեռք է բերել 2025 թվականի արտադրության նոր «Մերսեդես-Բենց»։
Տարեվերջին նրա կանխիկ միջոցները կազմել են 165 հազար դոլար, 17 հազար եվրո և 127 միլիոն դրամ։ Պաշտոնյան նաև հայտարարագրել է 5,1 միլիոն դրամ արժողությամբ ժամացույց։ Միաժամանակ, դեկտեմբերի 31-ի դրությամբ նրա վարկի մայր գումարի մնացորդը կազմել է շուրջ 147,5 միլիոն դրամ։
News.am-ի տվյալներով՝ 2025 թվականին Պետրոսյանը 16,7 միլիոն դրամ աշխատավարձ է ստացել Սննդամթերքի անվտանգության տեսչական մարմնից, իսկ 864 հազար դրամ՝ «ՅՈՒՄԱ ԳՐՈՒՊ» ՍՊԸ-ից ստացված վարձակալական վճարների տեսքով։
Տիգրան Պետրոսյանը «Քաղաքացիական պայմանագիր» կուսակցության անդամ է և ունի պատվիրակի կարգավիճակ։ Մինչև 2013 թվականը նա աշխատել է Ազգային անվտանգության ծառայությունում, այնուհետև զբաղվել բիզնեսով՝ 2018-2022 թվականներին ղեկավարելով «Էյր լոգիստիկ կարգո» ՍՊԸ-ն։ 2020-2021 թվականներին նա եղել է վարչապետի աշխատակազմի «Կոնդի առանձնատների տնտեսություն» ՊՈԱԿ-ի տնօրենի տեղակալը, 2022-2024 թվականներին՝ «Սպասարկում» ՊՈԱԿ-ի տնօրենը։ 2024 թվականի նոյեմբերին նշանակվել է Սննդամթերքի անվտանգության տեսչական մարմնի ղեկավարի տեղակալ, իսկ 2025 թվականի հունիսի 24-ից ղեկավարում է կառույցը։