168.am։ Ընտրովի հաշվետվողականություն. Ի՞նչ չենք իմանա մայիսի 28-ին
Մայիսի 28-ին Հանրապետության հրապարակում նախատեսվող ռազմական ցուցադրությունը, ըստ 168.am–ի հրապարակման, Նիկոլ Փաշինյանի իշխանությունը ներկայացնում է որպես վերջին տարիների ռազմական ձեռքբերումների և բանակի վերազինման «հաշվետվություն» հասարակությանը։ Վարչապետ Նիկոլ Փաշինյանը հայտարարել է, որ քաղաքացիները պետք է սեփական աչքերով տեսնեն վերջին տարիներին ձեռք բերված սպառազինությունն ու այն, ինչ իշխանությունը կոչում է «նոր տրամաբանության բանակ»։
Պաշտպանության նախարար Սուրեն Պապիկյանի խոսքով՝ ցուցադրվելու են հատկապես 2022-2025 թվականներին գնված զինատեսակները, որոնք մինչ այժմ չեն ներկայացվել հանրությանը։ Նա նաև հայտարարել է, որ 2025 թվականին Հայաստանի պաշտպանական ծախսերը կազմել են շուրջ 1 միլիարդ 700 միլիոն դոլար, մինչդեռ 2018 թվականին այդ թիվը եղել է մոտ 640 միլիոն դոլար։ Նրա պնդմամբ՝ միայն վերջին երեք տարիներին սպառազինության վրա ծախսվել է 5.4 անգամ ավելի շատ գումար, քան ամբողջ 1998-2018 թվականների ընթացքում։
168.am-ը հիշեցնում է նաև Նիկոլ Փաշինյանի հայտարարությունը, ըստ որի՝ Հայաստանի արտաքին պարտքի աճը, որը հասել է մոտ 8 միլիարդ դոլարի, պայմանավորված է նաև զենքի գնումներով։ Սակայն, երբ լրատվամիջոցները փորձել են պաշտպանության նախարարությունից պարզել, թե կոնկրետ որքան պետական պարտք է ձևավորվել սպառազինության ձեռքբերման համար և որքան գումար է ծախսվել 2022 թվականից հետո նոր զինատեսակների գնման վրա, գերատեսչությունը հրաժարվել է տրամադրել այդ տվյալները։
Իշխանությունները, մի կողմից, խոսում են միլիարդավոր դոլարների ռազմական ներդրումների մասին, իսկ մյուս կողմից՝ չեն ներկայացնում գնումների ամբողջական կառուցվածքը, պայմանագրերի մանրամասները կամ դրանց արդյունավետության գնահատականը։ Այս ֆոնին ռազմական թեման, ըստ հոդվածի, ավելի ու ավելի է վերածվում քաղաքական և նախընտրական գործիքի։
168.am-ը նաև անդրադառնում է վերջին տարիներին ձեռք բերված հնդկական և ֆրանսիական սպառազինությանը, այդ թվում՝ Akash-1S զենիթահրթիռային համակարգերին, Pinaka համազարկային կրակի համակարգերին, CAESAR ինքնագնաց հրետանային համակարգերին և հայկական արտադրության DEV-3 ու Dragonfly-3 անօդաչու սարքերին։ Միաժամանակ ընդգծվում է, որ նույնիսկ նման լայնածավալ ցուցադրության պայմաններում իշխանությունները շարունակում են սահմանափակել լրագրողների հասանելիությունն ու խուսափել մասնագիտական բաց քննարկումներից։
Հոդվածի եզրակացությամբ՝ մայիսի 28-ի միջոցառումը ոչ միայն ռազմական ցուցադրություն է, այլ նաև իշխանության քաղաքական հաշվետվություն և նախընտրական քարոզչական միջոցառում։ Իսկ քանի դեռ սպառազինության գնումների, պետական պարտքի և պաշտպանության ոլորտի միլիարդավոր դոլարների ծախսերի վերաբերյալ ամբողջական ու թափանցիկ հաշվետվություն չի ներկայացվել, այդ միջոցների իրական արդյունավետությունը և նպատակները կլինի կասկածելի։