Արթուր Համբարձումյան․ պաշտոնյաների աշխատավարձերը չեն արտացոլում նրանց իրական եկամուտները
Արթուր Համբարձումյանն իր տեսաբլոգում անդրադարձել է Հայաստանի բարձրաստիճան պաշտոնյաների աշխատավարձերի, հայտարարագրված եկամուտների և կուտակած կապիտալի հարաբերակցությանը։ Հղում անելով ֆրանսիացի տնտեսագետ Թոմա Պիկետիի «Կապիտալը 21-րդ դարում» աշխատությանը՝ նա նշել է, որ եվրոպական երկրներում մարդու եկամուտը ձևավորվում է աշխատավարձից և կապիտալից ստացվող եկամուտներից։ Համբարձումյանի խոսքով՝ Հայաստանում պաշտոնյաների պաշտոնական աշխատավարձերը հաճախ չեն արտացոլում նրանց իրական ֆինանսական հնարավորությունները։
Նա որպես օրինակներ հիշատակել է նախկին և ներկա բարձրաստիճան պաշտոնյաների՝ Գագիկ Բեգլարյանին, Արմեն Գևորգյանին և Սուրեն Պապիկյանին՝ հարց բարձրացնելով, թե արդյոք նրանց ունեցած կապիտալը հնարավոր էր ձևավորել միայն պետական աշխատավարձի հաշվին։ Համբարձումյանը նաև անդրադարձել է նախկին իրավապահ համակարգի բարձրաստիճան ներկայացուցիչներին՝ նշելով, որ Սերժ Սարգսյանի իշխանության տարիներին դատախազների և այլ պաշտոնյաների աշխատավարձերը, իր ներկայացմամբ, կազմել են մոտ 800 հազարից մինչև 1 մլն դրամ, մինչդեռ նրանցից ոմանք տնօրինել են տասնյակ հազարավոր դոլարների միջոցներ։
Համբարձումյանը քննադատել է նաև պատգամավորների վարձատրությունը։ Նրա խոսքով՝ բարձր աշխատավարձը կարող է արդարացված լինել այն դեպքում, երբ պատգամավորը քաղաքական ինքնուրույնություն է ցուցաբերում, սեփական քաղաքական միտք է ձևավորում և քվեարկում է խղճի ու համոզմունքների համաձայն։ Նա պնդել է, որ իրականում պատգամավորների մի մասը գործում է կուսակցական կարգապահության շրջանակում՝ անհրաժեշտ պահին պարզապես «համապատասխան կոճակը սեղմելով»։
Տեսաբլոգում նա առանձին անդրադարձել է Արցախի պաշտպանության բանակին տրամադրված սարքավորումների հետ կապված քրեական գործին։ Համբարձումյանի խոսքով՝ գործը վերաբերում էր սարքավորումների, այդ թվում՝ ջերմատեսիլ սարքերիի, տրամադրմանը և հետագայում դրանց վաճառքին։ Նա պահանջել է գլխավոր դատախազությունից և Նիկոլ Փաշինյանից պարզաբանել, թե ինչու է այդ քրեական գործը կարճվել՝ հատկապես այն պայմաններում, երբ իշխանությունը նախկին պաշտոնյաներին տարիներ շարունակ մեղադրում է թալանի և կոռուպցիայի մեջ։
Համբարձումյանը խոսել է նաև նախկին իշխանությունների մեդիա և քաղաքական ծախսերի մասին՝ պնդելով, որ Սերժ Սարգսյանի շրջապատը հարյուր հազարավոր դոլարներ է ծախսել բլոգերների, լրագրողների, խմբագիրների և տարբեր հրապարակային կարծիք ձևավորողների վրա։ Նրա խոսքով՝ այսօր էլ քաղաքական համակարգում պահպանվում է նույն տրամաբանությունը՝ բարձր պաշտոնյաների և պատգամավորների վարձատրության բարձրացման պայմաններում սոցիալապես անապահով քաղաքացիներին ուղղվող հատկացումները կրճատվում են։
Այս համատեքստում Համբարձումյանի բարձրացրած հարցերը զուգահեռվում են պաշտպանության նախարար Սուրեն Պապիկյանի 2025 թվականի հայտարարագրի տվյալների հետ։ «Ժողովուրդ» օրաթերթի հրապարակման համաձայն՝ Պապիկյանը տարվա ընթացքում Կենտրոն վարչական շրջանում ձեռք է բերել բնակարան՝ 69 մլն 408 հազար 979 դրամով, և ավտոկայանատեղի՝ 11 մլն 881 հազար 200 դրամով։ Երկու գույքերի ընդհանուր արժեքը կազմել է 81 մլն 290 հազար 179 դրամ։
Նույն հայտարարագրի համաձայն՝ Պապիկյանի 2025 թվականի ընդհանուր եկամուտը կազմել է 36 մլն 252 հազար 58 դրամ, որից 27 մլն 545 հազար 921 դրամը՝ Պաշտպանության նախարարությունից ստացած աշխատավարձն ու դրան հավասարեցված վճարումները։ Նա ևս 6 մլն դրամ ստացել է վարձակալությունից, 1 մլն դրամ՝ գյուղատնտեսական գործունեությունից, իսկ 1 մլն 706 հազար 137 դրամ՝ եկամտային հարկի վերադարձից։ Տարվա վերջում նրա բանկային հաշիվներում առկա էր 23 մլն 881 հազար դրամ, 30 հազար դոլար և 20 հազար 156 եվրո, իսկ վարկերի մայր գումարի մնացորդը կազմել էր 51 մլն 741 հազար դրամ։
Հենց այսպիսի թվերի համադրությունն է, որ Համբարձումյանի բարձրացրած հիմնական հարցը դարձնում է հանրային քննարկման առարկա՝ որքանո՞վ են բարձրաստիճան պաշտոնյաների պաշտոնական եկամուտներն ու աշխատավարձերը բացատրում նրանց կուտակած ունեցվածքն ու ֆինանսական միջոցները։