Աննա Գրիգորյանը՝ Փաշինյանի օլիգարխների դեմ պայքարի մասին․ «Հիմա դարձել են ՔՊ-ական»
«Հայաստան» խմբակցության պատգամավոր Աննա Գրիգորյանը քննադատել է Նիկոլ Փաշինյանի իշխանությանը՝ հայտարարելով, որ նախկինում օլիգարխների և քրեաօլիգարխիկ համակարգի դեմ պայքարի մասին խոսող իշխանությունը այսօր համագործակցում է նախկին իշխանությունների ներկայացուցիչների հետ։
«Նիկոլ Փաշինյանը ժամանակին այստեղ որ գալիս ասում էր՝ մենք օլիգարխների դեմ պետք է պայքարենք, քրեաօլիգարխիկ համակարգի դեմ։ Մարդը այդ մարդկանցից մեկն է, որ այստեղ նստած էր, հիմա ձեր գլխին զոնտիկ է պահում, ձեզ համար չորրորդ կարգի ցորեն է բերում, դուք էլ գնում եք հետը հատիկ-հատիկ սելֆի եք անում», — ասել է Գրիգորյանը՝ նկատի ունենալով Սամվել Ալեքսանյանին։
Անդրադառնալով Ջերմուկ Գրուպի սեփականատեր Աշոտ Արսենյանին՝ պատգամավորը հարցրել է, թե արդյոք նրա որդին մարզպետ չէ, և հիշեցրել, որ 2021 թվականին նա ղեկավարել է «Պատիվ ունեմ» դաշինքի հանրապետականների նախընտրական շտաբը։ Գրիգորյանը շեշտել է, որ ինքը երբեք իշխանության մաս չի կազմել և արտահայտել է իր սկզբունքային դիրքորոշումը։
Նրա խոսքով՝ նախկին իշխանությունների օրոք պետական լծակներն օգտագործած և իրենց կարողությունները կուտակած որոշ մարդիկ այժմ դարձել են ՔՊ-ի ներկայացուցիչներ։
«Ինչքան Հանրապետական «տասօֆշիկ» ա, կներեք բառիս համար, հիմա ՔՊ-ի համար ա աշխատում։ Կարո՞ղ ա էդպես չի։ Իհարկե այդպես ա», — հայտարարել է Աննա Գրիգորյանը՝ կասկածի տակ դնելով Փաշինյանի՝ նախկին օլիգարխիկ համակարգի դեմ պայքարի մասին հայտարարությունների հետևողականությունը։
https://www.youtube.com/shorts/Vqb-RXWhOns