Զրոյական խնայողություններից դեպի միլիոնավոր ակտիվներ․ Աննա Հակոբյանի ֆինանսական շրջադարձը

Աննա Հակոբյանի 2018–2024 թվականների հայտարարագրերը արձանագրում են ոչ թե աստիճանական դինամիկա, այլ ֆինանսական մոդելի կտրուկ շրջադարձ։

2018–2023 թվականներին նրա եկամուտները մնացել են տարեկան 3–15 միլիոն դրամի սահմաններում և ձևավորվել են հիմնականում աշխատավարձի ու վարձակալության հաշվին։ 2022–2023 թվականների դրությամբ ֆինանսական «բարձիկը» գրեթե զրոյական էր. բացակայում էին խնայողությունները, հաշիվների մնացորդները զրոյական էին, կանխիկ միջոցներ չկային։

2024 թվականին իրավիճակը փոխվում է թռիչքաձև։

Տարեկան եկամուտը հասնում է 105,9 միլիոն դրամի, ինչը ավելի քան 30 անգամ գերազանցում է նախկին մակարդակը։ Հիմնական աղբյուրներն են.

• բնակարանի վաճառք Շենգավիթում՝ 45,5 մլն դրամ,
• հիփոթեքային վարկ «Ամերիաբանկում»՝ 44,4 մլն դրամ,
• աշխատավարձ «Իմ քայլը» հիմնադրամում՝ 13,2 մլն դրամ,
• եկամտահարկի վերադարձ։

Միաժամանակ հայտնվում են ակտիվներ, որոնք նախկինում չկային.

40 հազար դոլար և 10 մլն դրամ ավանդներում, կանխիկ միջոցներ՝ 8,5 հազար դոլար և 650 հազար դրամ, հաշիվների մնացորդներ՝ 3,6 մլն դրամ։

Առանձնահատուկ ուշադրության է արժանի «Իջևանատուն» ՓԲԸ-ի հետ գործարքը. Հակոբյանը 49,3 մլն դրամի փոխառություն է տրամադրել կառուցվող համալիրում բնակարան գնելու համար։ Նույն գումարը արտացոլված է նաև Նիկոլ Փաշինյանի հայտարարագրում, ինչը մատնանշում է գործողությանը նրանց սինխրոն (միաժամանակյա) մասնակցությունը։

Մեկ տարվա ընթացքում տեղի է ունենում անցում «ընթացիկ եկամուտներով ապրելու» մոդելից դեպի կապիտալի ակտիվ կառավարում՝ ներդրումներով, ավանդներով և խոշոր ֆինանսական գործարքներով։