Հակոբ Արշակյանի քաղաքական մայրամուտը․ ինչ ունեցվածքով է ՔՊ-ի ցուցակից դուրս մնացած փոխխոսնակը հեռանում իշխանությունից
«Ժողովուրդ» օրաթերթի ուսումնասիրությունը բացահայտում է, թե ինչ գույքային և ֆինանսական վիճակով է ակտիվ քաղաքականությունից հեռանում Ազգային ժողովի նախագահի տեղակալ Հակոբ Արշակյանը՝ այն պաշտոնյաներից մեկը, որի քաղաքական վերելքը ամբողջությամբ կապվում է 2018 թվականի իշխանափոխության հետ։
Եթե մինչև «թավշյա հեղափոխությունը» Արշակյանի կենսագրությունը սահմանափակվում էր մասնավոր հատվածում զբաղեցրած ինժեներական և կառավարչական պաշտոններով, ապա հեղափոխությունից հետո ընդամենը մի քանի տարվա ընթացքում նա հասցրեց զբաղեցնել գրեթե բոլոր հնարավոր բարձր պաշտոնները՝ նախարարի տեղակալից մինչև նախարար, այնուհետև՝ Ազգային ժողովի փոխնախագահ։
Սակայն այսօր, երբ ՔՊ-ի նախընտրական ցուցակում նրա անունը բացակայում է, առավել հետաքրքիր է ոչ թե քաղաքական ապագայի, այլ այն հարցի պատասխանը, թե ինչ ֆինանսական արդյունքով է ավարտվում իշխանական այս յոթնամյա շրջանը։
Մասնավոր հատվածից՝ իշխանական վերնախավ
Հակոբ Արշակյանի քաղաքական կենսագրությունը դասական օրինակ է այն պաշտոնյաների, որոնք 2018 թվականից հետո պետական համակարգում գրեթե անընդմեջ բարձր պաշտոններ են զբաղեցրել։
Նախարարի առաջին տեղակալ, նախարար, բարձր տեխնոլոգիական արդյունաբերության նախարար, ապա խորհրդարանի փոխխոսնակ․ իշխանական կարիերայի այս արագընթաց աճը զուգահեռվել է նաև նրա գույքային և ֆինանսական ցուցանիշների փոփոխությամբ։
Թեև Արշակյանը չի դասվում Հայաստանի ամենահարուստ պաշտոնյաների շարքին, նրա հայտարարագրերը ցույց են տալիս, որ պետական պաշտոնավարման տարիներին ձևավորվել է նոր գույքային փաթեթ՝ բնակարաններով, այգետնակով, նոր ավտոմեքենայով և բազմամիլիոնանոց ֆինանսական շրջանառությամբ։
Բնակարանի վաճառք, նոր բնակարան և նոր ավտոմեքենա
2025 թվականի հայտարարագիրը հատկապես ուշագրավ է։
Արշակյանը վաճառել է Դավթաշեն վարչական շրջանում գտնվող իր բնակարանը՝ 40,8 միլիոն դրամով։ Մի քանի ամիս անց ձեռք է բերել նոր բնակարան՝ 28,25 միլիոն դրամ արժողությամբ։
Նույն տարում նա գնել է նաև 2024 թվականի արտադրության BYD մակնիշի ավտոմեքենա, որի արժեքը կազմել է 17,4 միլիոն դրամ։
Այս ամենին զուգահեռ պաշտոնյան իրականացրել է գրեթե 10 միլիոն դրամի վերանորոգման աշխատանքներ։
Այսինքն՝ ընդամենը մեկ տարվա ընթացքում իրականացվել են տասնյակ միլիոնավոր դրամների գույքային գործարքներ, որոնք էականորեն փոխել են նրա ակտիվների կառուցվածքը։
Եկամուտները կայուն աճել են
Հայտարարագրերի ուսումնասիրությունը ցույց է տալիս, որ Արշակյանի պաշտոնական եկամուտները վերջին տարիներին կայուն աճ են արձանագրել։
2022 թվականին նրա աշխատավարձը կազմել է շուրջ 11,2 միլիոն դրամ։
2023 թվականին ընդհանուր եկամուտներն արդեն գերազանցել են 17,2 միլիոն դրամը։
2024 թվականին՝ մոտ 18,3 միլիոն դրամ։
Իսկ 2025 թվականին՝ ավելի քան 21 միլիոն դրամ։
Այսպիսով, երեք տարվա ընթացքում պաշտոնական եկամուտներն աճել են գրեթե կրկնակի։
Թեև այս աճը հիմնականում պայմանավորված է պետական աշխատավարձերով և եկամտային հարկի վերադարձի ծրագրով, այնուամենայնիվ այն տեղի է ունեցել մի ժամանակաշրջանում, երբ Հայաստանի հազարավոր քաղաքացիներ շարունակում են ապրել սոցիալական դժվար պայմաններում, իսկ աղքատության մակարդակը շարունակում է մնալ հանրային լուրջ մարտահրավեր։
Մի բան ակնհայտ է․ հեղափոխությունից հետո իշխանության եկած «նոր Հայաստանի» կադրերից հերթականը քաղաքական բեմից հեռանում է արդեն բոլորովին այլ գույքային և ֆինանսական վիճակով, քան այն ժամանակ, երբ առաջին անգամ մտավ պետական կառավարման համակարգ։