"Ժողովուրդ"․ Լրագրությունից՝ իշխանություն, իշխանությունից՝ գույքի աճ. ինչպես է փոխվել Սիսակ Գաբրիելյանի բարեկեցությունը
"Ժողովուրդ" օրաթերթը գրում է․
Նորընտիր խորհրդարանում կրկին մանդատ է ստացել Ազգային ժողովի «Քաղաքացիական պայմանագիր» խմբակցության պատգամավոր, ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը։ Սակայն նրա քաղաքական ուղին հետաքրքիր է ոչ միայն այն պատճառով, որ նախկին լրագրողը դարձավ իշխանական պատգամավոր, այլ նաև այն պատճառով, թե ինչպես են այդ տարիներին փոխվել նրա ունեցվածքն ու ֆինանսական հնարավորությունները։
Լրագրողական անցյալից՝ իշխանական վերելք
Գաբրիելյանը մինչև 2018 թվականը աշխատել է լրագրողական ոլորտում․ սկզբում՝ «Ա1+»-ում, ապա՝ «Ազատություն» ռադիոկայանում որպես լրագրող և հաղորդավար։ 2019 թվականին «Իմ քայլը» դաշինքի ցուցակով նա դարձավ պատգամավոր, իսկ 2021-ին վերընտրվեց արդեն «Քաղաքացիական պայմանագիր» կուսակցության ցուցակով։
Այն ժամանակ նրա հայտարարագրած ունեցվածքը բավական համեստ էր․ Շենգավիթում համատեղ սեփականությամբ բնակարան, 2014 թվականի Hyundai և շուրջ 7.7 մլն դրամ տարեկան եկամուտ։
Սակայն պատգամավորական գործունեությունը չանցավ առանց սկանդալների։ 2020 թվականի դեկտեմբերի 28-ին ԱԺ շենքի մոտ տեղի ունեցած միջադեպի ժամանակ քաղաքացիները ձու էին նետել Գաբրիելյանի ուղղությամբ, իսկ նա պատասխանել էր հայհոյախառն արտահայտություններով։ Քրեական գործ հարուցվեց «Հայաստան» խմբակցության պատգամավոր Աշոտ Սիմոնյանի դեմ։
Հատկանշական է, որ այս գործով դատական նիստերը ամիսներ շարունակ հետաձգվում էին, քանի որ իշխանական պատգամավորը չէր ներկայանում դատարան՝ երբեմն նշելով, թե ծանուցում չի ստացել, երբեմն՝ թե գործուղման մեջ է։ Դատարան նա առաջին անգամ ներկայացավ միայն 2023 թվականի մայիսի 4-ին։
2021․ առաջին առանձնատունը
Պատգամավոր դառնալուց ընդամենը երկու տարի անց Գաբրիելյանը հայտարարագրեց արդեն Գյումրիում գնված անհատական բնակելի տուն, որի արժեքը կազմել է 7.8 մլն դրամ։
Նույն տարում տեղի ունեցավ նաև ավտոմեքենայի առաջին «թարմացումը»․
- վաճառվեց 2014թ. Hyundai-ն՝ 3.5 մլն դրամով,
- գնվեց 2018թ. Hyundai՝ 6.5 մլն դրամով։
Բացի այդ, նա շուրջ 23 մլն դրամի երկու անտոկոս փոխառություն տրամադրեց «ԵՊՀ շրջանավարտների միավորում» ՀԿ-ին։ Հարց է առաջանում՝ ինչպե՞ս նախկին լրագրողը կարճ ժամանակում կարողացավ ձևավորել նման ծավալի դրամական միջոցներ։
2022․ վերանորոգումներ և աճող պարտքեր
2022 թվականին անշարժ գույքը չէր փոխվել, սակայն պատգամավորը հայտարարագրել է 6.5 մլն դրամի վերանորոգման աշխատանքներ։ Միևնույն ժամանակ նրա վարկային պարտավորությունները աճել են մինչև 22.8 մլն դրամ։
Այս փուլում արդեն ակնհայտ էր, որ պատգամավորի ֆինանսական շրջանառությունը զգալիորեն մեծացել է՝ համեմատած մինչքաղաքական շրջանի հետ։
2023․ Hyundai-ից՝ Volkswagen
2023 թվականը դարձավ հերթական թանկարժեք գնումների տարին․
- 2018թ. Hyundai-ն վաճառվեց 8 մլն դրամով,
- նույն օրը ձեռք բերվեց 2022 թվականի Volkswagen՝ 12 մլն դրամով։
Միայն ավտոմեքենայի փոխարինման տարբերությունը կազմել է 4 մլն դրամ, ինչը համադրելի է նախկին լրագրողի մի քանի տարվա աշխատավարձի հետ։
2024․ երրորդ անշարժ գույքը
Ամենաուշագրավ փոփոխությունը տեղի ունեցավ 2024 թվականին։ Գաբրիելյանը 22.9 մլն դրամով ձեռք բերեց բնակարան Երևանում, ընդ որում վաճառողը հենց այն կազմակերպությունն էր, որին նախկինում նա միլիոնավոր դրամների փոխառություններ էր տրամադրել՝ «ԵՊՀ շրջանավարտների միավորում» ՀԿ-ն։
Նույն տարում այդ ՀԿ-ն ամբողջությամբ վերադարձրել է փոխառությունները, և պատգամավորն արդեն հայտարարագրել է.
- 3 անշարժ գույք,
- 800 հազար դրամ կանխիկ միջոց,
- 23.9 մլն դրամ վարկային պարտավորություն։
2025․ երեք անշարժ գույք և աճող եկամուտ
2025 թվականի վերջի դրությամբ Սիսակ Գաբրիելյանն ունեցել է.
- Շենգավիթի բնակարանը,
- 2024-ին գնված երևանյան բնակարանը,
- Գյումրիի առանձնատունը,
- 2022 թվականի Volkswagen ավտոմեքենան։
Նրա կանխիկ միջոցները կրկնապատկվել են՝ հասնելով 1.6 մլն դրամի, իսկ տարեկան եկամուտը գերազանցել է 18.9 մլն դրամը, որից 15.1 մլն դրամը՝ պատգամավորական աշխատավարձ։
Թվերը խոսում են
Եթե համեմատենք 2020 և 2025 թվականները, կստանանք հետևյալ պատկերը․
Այսինքն՝ հինգ տարվա ընթացքում պատգամավորը ստացել է ևս երկու անշարժ գույք, ավելի թանկ ավտոմեքենա, զգալիորեն ավելացրել եկամուտները և կուտակել անհամեմատ ավելի մեծ դրամական միջոցներ։
Պատահակա՞ն աճ, թե՞ մանդատի ազդեցություն
Իհարկե, հայտարարագրված տվյալները ինքնին ապօրինություն չեն ապացուցում։ Սակայն քաղաքականության մեջ հաճախ կարևոր է ոչ միայն օրինականության, այլև հանրային ընկալման հարցը։
Սիսակ Գաբրիելյանի դեպքում փաստերը ցույց են տալիս, որ.
- նախկին լրագրողը քաղաքականություն մտնելու պահին ունեցել է համեստ ունեցվածք,
- պատգամավորական գործունեության ընթացքում նրա գույքային դրությունը բազմապատկվել է,
- ձեռք են բերվել նոր բնակարան և առանձնատուն,
- ավտոմեքենան փոխարինվել է ավելի բարձր դասի մեքենայով,
- իրականացվել են միլիոնավոր դրամների վերանորոգումներ,
- տարեկան եկամուտը աճել է գրեթե 2.5 անգամ։
Երբ իշխանությունը տարիներ շարունակ հասարակությանը կոչ է անում «համեստ ապրել» և պայքարել սոցիալական անհավասարության դեմ, բնական հարց է առաջանում՝ ինչո՞ւ իշխանական պատգամավորների զգալի մասի բարեկեցությունը մանդատ ստանալուց հետո այդքան արագ աճում է։