Ինչ ունեցվածք ունեն Արարատ Միրզոյանն ու կինը
Ժողովուրդ օրաթերթը ուսումնասիրել է Արարատ Միրզոյանի վերջին տարիների հայտարարագրերը և պարզել մի շարք ուշագրավ տվյալներ։ Նշենք, որ Արարատ Միրզոյանը ՀՀ արտաքին գործերի նախարարի պաշտոնը զբաղեցնում է 2021 թվականի օգոստոսի 19-ից։
2024 թվական
ArmLur.am-ը պարզեց, որ 2024 թվականի հայտարարագրի համաձայն՝ Միրզոյանը Կոտայքի մարզի Նաիրի համայնքում ունի անհատական բնակելի տուն՝ հողամասով և տնտեսական շինություններով, որը ձեռք է բերել 2022 թվականի դեկտեմբերի 23-ին։ Բացի այդ, նա Երևանում ունի բնակարան, որը ձեռք է բերել 2018 թվականին։
Բանկային հաշիվներում առկա է եղել 2 մլն 746 հազար դրամ և 22 հազար ԱՄՆ դոլար, իսկ կանխիկ՝ 37 հազար դոլար և 2 մլն 750 հազար դրամ։
Հաշվետու տարում նրա եկամուտը կազմել է 24 մլն 771 հազար դրամ, որից 21 մլն 752 հազար դրամը՝ աշխատավարձ ՀՀ ԱԳՆ-ից, իսկ 3 մլն 18 հազար դրամը՝ եկամտային հարկի վերադարձ։
ArmLur.am-ը նաև պարզեց, որ տարվա ընթացքում Միրզոյանը զգալի ծախսեր է իրականացրել․ միայն անշարժ գույքի վերանորոգման համար ծախսել է 16 մլն 800 հազար դրամ։ Բացի այդ, հանգստի, ուսման և վարկերի մարման վրա ծախսերը ևս միլիոնավոր դրամներ են կազմել։
Նրա հիպոթեքային պարտավորությունները տարեվերջին կազմել են 26 մլն 643 հազար դրամ։
2023 թվական
ArmLur.am-ի ուսումնասիրությամբ՝ 2023 թվականին Միրզոյանի բանկային հաշիվներում եղել է 3 մլն 500 հազար դրամ և 30 հազար դոլար, իսկ կանխիկ՝ 50 հազար դոլար և 2 մլն դրամ։
2022 թվական
ArmLur.am-ը պարզեց, որ 2022 թվականին Միրզոյանը ձեռք է բերել Կոտայքի մարզի Նաիրի համայնքում գտնվող առանձնատունը՝ 112 մլն դրամ արժողությամբ։
Նույն տարում նրա բանկային ավանդները կազմել են 70 հազար դոլար, հաշիվներում ունեցել է 1 մլն 900 հազար դրամ և 20 հազար դոլար, իսկ կանխիկ՝ 25 հազար դոլար և 6 մլն դրամ։
2021 թվական
ArmLur.am-ի տվյալներով՝ 2021 թվականին Միրզոյանը ունեցել է 70 հազար դոլար բանկային ավանդ, 9 մլն 100 հազար դրամ և 70 հազար 188 դոլար հաշիվների վրա, ինչպես նաև 8 մլն դրամ կանխիկ միջոցներ։
Կնոջ՝ Գոհար Աբաջյանի հայտարարագիրը
ArmLur.am-ը ուսումնասիրել է նաև Արարատ Միրզոյանի կնոջ՝ Գոհար Աբաջյանի հայտարարագիրը։
Նա 2024 թվականին ձեռք է բերել 2024 թվականի արտադրության BMW մակնիշի ավտոմեքենա՝ մոտ 39 հազար եվրոյով, իսկ նախկին KIA մեքենան վաճառել է 4 մլն 508 հազար դրամով։
Տարվա ընթացքում նրա եկամուտները կազմել են 46 մլն 301 հազար դրամ։ Նա աշխատավարձ է ստացել «ԷնՎիդիա Արմենիա» և «Քոգնայզ Էնջինիրինգ» ընկերություններից։
Բանկային միջոցները տարվա ընթացքում նվազել են, իսկ կանխիկ գումարը կազմել է 10 հազար դոլար և 340 հազար դրամ։
Միաժամանակ, նա ստացել է 11 մլն դրամ վարկ, իսկ ընդհանուր վարկային պարտավորությունները տարեվերջին հասել են 78 մլն դրամի։
Նշենք նաև, որ «Ժողովուրդ» օրաթերթը դեռ 2025 թվականի հունիսի 4-ին գրել էր, որ Գոհար Աբաջյանը նշանակվել է «Էնթերփրայզ Արմենիա» ներդրումային կենտրոնի ղեկավար։
Այսպիսով, ArmLur.am-ի ուսումնասիրությունը ցույց է տալիս, որ Արարատ Միրզոյանի ընտանիքը վերջին տարիներին ունեցել է տասնյակ միլիոնավոր դրամների եկամուտներ, ձեռք է բերել 112 մլն դրամ արժողությամբ առանձնատուն, ինչպես նաև՝ ընտանիքում իրականացվել է թանկարժեք գնում, մասնավորապես կինըգնել է ՝ 39 հազար եվրո արժողությամբ BMW ավտոմեքենա։
Սակայն այստեղ առաջանում են մի շարք հարցադրումներ․
Ինչպե՞ս են համադրվում այս ծավալի ծախսերը պաշտոնական եկամուտների հետ։
Ի՞նչ աղբյուրներով են ձևավորվել խոշոր կանխիկ միջոցները՝ տասնյակ հազարավոր դոլարների չափով։
Որքանո՞վ են հիմնավորված նման թանկարժեք գնումները՝ թե՛ առանձնատան, թե՛ ավտոմեքենայի դեպքում։
Ինչպե՞ս է բացատրվում նաև մեծածավալ վարկերի, եկամուտների և միաժամանակ զգալի ծախսերի համադրությունը։