Փաստինֆո․218 միլիոն դրամ՝ «ՔՊ»-ական ավագանու անդամի ընկերությանը․ Արտաշատի համայնքապետարանը խոշոր պայմանագիր է կնքել
Արտաշատի համայնքապետարանը 218 միլիոն 236 հազար 614 դրամի պայմանագիր է կնքել «Գարանտ Կապիտալ Ստրոյ» ՍՊԸ-ի հետ, որի տնօրենը Արտաշատի համայնքապետարանի ավագանու «Քաղաքացիական պայմանագիր» խմբակցության անդամ Նարեկ Բաղդասարյանն է։ «Փաստինֆո»-ն այդ մասին տեղեկանում է պաշտոնական բաց աղբյուրներում հրապարակված փաստաթղթերից։ Նշված գումարը համարժեք է 604 հազար 359 դոլարի։
2022-2024 թվականներին «Քաղաքացիական պայմանագիր» խմբակցության ավագանու անդամ Նարեկ Բաղդասարյանի ընկերությունը Արտաշատ համայնքում շուրջ 723 մլն դրամի ճանապարհաշինական սուբվենցիոն ծրագրերի հաղթող է եղել։ Այդ մասին գրել էր «Հետք»-ը։
Կնքված պայմանագրից տեղեկանում ենք, որ Արտաշատ համայնքի Մասիս, Մրգավան և Նշավան բնակավայրերում կիրականացվեն փողոցների նորոգման և ասֆալտապատման աշխատանքներ։
«ՔՊ»-ական ավագանու անդամին պատկանող ընկերության հետ պայմանագրեր են կնքել Արարատի, Արտաշատի և Վեդիի համայնքապետարանները, Արարատի մարզպետի աշխատակազմը, ինչպես նաև ՀՀ տարածքային կառավարման և ենթակառուցվածքների նախարարության Ջրային կոմիտեն։
Ընկերության հետ կնքված պայմանագրերի գումարները բավականին խոշոր են․ ՍՊԸ-ն հիմնականում ստացել է միլիոնավոր դրամների պատվերներ։