«Hetq». «Ֆլայուան Արմենիայի» մոլդովացի սեփականատերերը հայտնվել են իրավապահների ուշադրության կենտրոնում
«Hetq»-ի հաղորդմամբ՝ «Ֆլայուան Արմենիա» ավիաընկերության 46 %-ի սեփականատերեր Վլադիմիր Չեբոտարն ու Միրչա Մալեկան Մոլդովայում հայտնվել են իրավապահների ուշադրության կենտրոնում։ Մոլդովայի կազմակերպված հանցավորության դեմ պայքարի և հատուկ գործերով դատախազությունը հոկտեմբերի 2-ին հայտարարել է կազմակերպված խմբի գործունեության բացահայտման մասին։ Ըստ քննության՝ խմբի անդամները 2016 թվականից համակարգված կերպով օգտագործել են տարբեր իրավաբանական անձանց և միջնորդների՝ հարկերից խուսափելու համար։ Գրեթե 41 մլն մոլդովական լեյի (մոտ 2,3 մլն դոլար) չհայտարարագրված միջոցները, ըստ դատախազության, օգտագործվել են ավիաընկերության կապիտալը համալրելու համար։ Միայն 2016 թվականի համար չվճարված հարկային պարտավորությունները գնահատվում են շուրջ 5 մլն լեյ։
Մոլդովայի պետական անվտանգության համար կարևոր ներդրումների ուսումնասիրման խորհուրդը (CEIISS) 11 ամիս տևած ուսումնասիրությունից հետո հունիսի 22-ին որոշում էր կայացրել Fly One-ի վերահսկողության փոփոխության վերաբերյալ՝ ընկերության սեփականատերերին 90 օր ժամանակ տալով համապատասխան քայլեր կատարելու համար։ Չնայած դրան՝ Fly One-ի տնօրենների խորհրդի նախագահ Չեբոտարը սեպտեմբերի 29-ին հայտարարել էր, որ բաժնեմասերը չեն վաճառելու։ Դրանից առաջ՝ հունիսի 10-ին, մոլդովական ընկերությունն իր՝ «Ֆլայուան Արմենիայում» ունեցած 46 %-ը փոխանցել էր Երևանում մարտին հիմնադրված «Ֆլայ Սոլուշն» ՍՊԸ-ին։ Այդ ընկերության բաժնեմասերը հավասարապես պատկանում են Չեբոտարին և Մալեկային, իսկ փոփոխությունը Հայաստանի պետական ռեգիստրում գրանցվել է օգոստոսի 14-ին։ Այսպիսով՝ մոլդովական Fly One-ն այլևս անմիջականորեն չի տիրապետում հայկական փոխադրողի բաժնեմասին, սակայն Չեբոտարն ու Մալեկան շարունակում են վերահսկել այն նորաստեղծ հայկական ընկերության միջոցով։
Մոլդովայի դատախազության տվյալներով՝ հոկտեմբերի 1-ին իրավապահները խուզարկություններ են իրականացրել մի շարք անձանց բնակարաններում, գրասենյակներում և տրանսպորտային միջոցներում՝ առգրավելով հաշվապահական փաստաթղթեր, կանխիկ գումար, համակարգչային սարքավորումներ և այլ նյութեր։ Քննությունը շարունակվում է։ CEIISS-ի ուսումնասիրության շրջանակում ուշադրության կենտրոնում են եղել նաև Fly One-ի և «Ֆլայուան Արմենիայի» հետ փոխկապակցված անձանց հնարավոր կապերը միջազգային պատժամիջոցների տակ գտնվող անձանց հետ։ Մոլդովական լրատվամիջոցներն այս համատեքստում հիշատակել են օլիգարխ Վլադիմիր Պլախոտնյուկին, որի մերձավոր շրջապատում է եղել Չեբոտարը։ Սակայն Fly One-ում Պլախոտնյուկի հնարավոր բիզնես շահերի կամ մասնակցության վերաբերյալ հստակ տվյալներ չեն ներկայացվել, իսկ Չեբոտարը հերքել է այլ շահառու սեփականատերերի առկայությունը։ 2026 թվականի ապրիլին Պլախոտնյուկը դատապարտվել է 19 տարվա ազատազրկման՝ հանցավոր խմբավորում ղեկավարելու, փողերի լվացման և խարդախության համար։
Չեբոտարն ու Մալեկան նախկին պետական պաշտոնյաներ են․ առաջինը 2015-2017 թվականներին զբաղեցրել է Մոլդովայի արդարադատության նախարարի պաշտոնը, ապա եղել պատգամավոր, իսկ Մալեկան 2015-2016 թվականներին ղեկավարել է երկրի քաղաքացիական ավիացիայի ոլորտը։ Fly One-ը սկսել է գործունեությունը նրանց պաշտոնավարման տարիներին։ Լրագրողական հետաքննությունից հետո, որը բացահայտել էր Մալեկայի կապը ավիաընկերության սեփականատերերի հետ, Մոլդովայի վարչապետը խոստովանել էր շահերի բախման առկայությունը, և Մալեկան հրաժարական էր տվել։ «Ֆլայուան Արմենիայի» հայկական բաժնեմասի փոխանցումը տեղի է ունեցել այն ժամանակ, երբ Մոլդովայում Fly One-ի սեփականատերերի նկատմամբ արդեն պահանջ էր ներկայացվել փոխել ընկերության վերահսկողության կառուցվածքը։