«Հետք». ինչպես կանգառներն ու գետնանցումը դարձան Բյուրեղավանի համայնքապետի ընտանիքի սեփականությունը
Երևան-Սևան մայրուղու՝ Արզնիի հատվածում գտնվող երկու կանգառասրահներն ու գետնանցումը, որոնք կառուցվել էին ուղևորների հարմարավետությունն ու անվտանգությունն ապահովելու համար, տարիների ընթացքում հայտնվել են մասնավոր ընկերության ձեռքում։ «Հետք»-ի հետաքննության համաձայն՝ գույքը պատկանում է «Արզնի-էքսպրես» ՍՊԸ-ին, որի բաժնետերերից մեկը Բյուրեղավանի համայնքապետ Հակոբ Բալասյանի կինն է։ Այսօր կանգառներից մեկում արագ սննդի կետ է գործում, մյուսը չի օգտագործվում, իսկ գետնանցումը փակ է։
Կանգառասրահները կառուցվել են 1970-ականներին՝ սովետական մոդեռնիզմի ոճով։ 1990-ականների սկզբին դրանք վերակառուցելու թույլտվություն է ստացել «Արզնի-էքսպրես» ընկերությունը, սակայն 2005 թվականին Կադաստրի կոմիտեն մերժել է գույքի նկատմամբ սեփականության իրավունքի գրանցումը՝ նշելով, որ շինությունները գտնվում են Ավտոմոբիլային տրանսպորտի նախարարության հաշվեկշռում, իսկ ընկերությանը միայն վերակառուցման թույլտվություն է տրվել։ Մեկ տարի անց ընկերությունը դիմել է դատարան՝ կանգառասրահներն ու սանհանգույցները տիրազուրկ ճանաչելու պահանջով։ Դատարանը բավարարել է հայցը, և գույքի նկատմամբ սեփականության իրավունքը գրանցվել է ընկերության անունով։
Հողամասերն ընկերությունը ձեռք է բերել 2007 թվականին՝ Արզնիի համայնքի ավագանու որոշմամբ, առանց աճուրդի։ Ընդհանուր 2660 քմ մակերեսով երկու հողամասերի համար սահմանվել է 7 մլն 820 հազար դրամ՝ մեկ քառակուսի մետրի դիմաց 2940 դրամ։ «Հետք»-ի տվյալներով՝ ընկերությունը հիմնադրել է Հակոբ Բալասյանի հայրը՝ Սուրեն Բալասյանը, իսկ այժմ դրա 50 տոկոս բաժնեմասը պատկանում է նրա կնոջը՝ Աննման Ղուկասյանին։ Հակոբ Բալասյանը Բյուրեղավանը ղեկավարում է 2008 թվականից։
Հրապարակման համաձայն՝ կադաստրային գործում բացակայում է այն ավագանու որոշումը, որը Կադաստրի կոմիտեն նշել էր որպես սեփականության իրավունքի գրանցման հիմք։ Իրականում հողամասերն օտարվել են 2007 թվականի ապրիլի 25-ի որոշմամբ։ Գույքի մասնավորեցումից հետո փակվել է նաև գետնանցումը։ Օգոստոսի 26-ին այդ հատվածում փողոցն անցնելիս 25-ամյա երիտասարդը վրաերթի է ենթարկվել և մահացել։ Այսպիսով, նախկին հանրային ենթակառուցվածքը վերածվել է մասնավոր բիզնեսի տարածքի, իսկ մայրուղին անվտանգ հատելու հնարավորությունից զրկված քաղաքացիները ստիպված են ճանապարհն անցնել վերգետնյա հատվածով։